Teatri / Kinemaja verore

Viti 2024 shënon një pikë kthesë në veprimtarinë e Drejtorisë së Përgjithshme të Arkivave (DPA). Përmes jetësimit të një projekti novator, DPA-ja ndryshon krejtësisht faqe, duke u shndërruar nga një institucion arkivor në një kompleks të mirëfilltë kulturor.

Me çeljen e Kinemasë Verore, e cila zotëron një kapacitet prej 140 ulësesh, DPA-ja ofron një alternativë kulturore bashkëkohore. Në sajë të një shërbimi që ndërthur edukimin me zbavitjen, kjo hapësirë i adresohet veçanërisht të rinjve, duke i inkurajuar të njohin faqet e lavdishme të historisë sonë kombëtare.

Kinemaja Verore e DPA-së e ngriti siparin me shfaqjen e një prej filmave më ikonikë të kinematografisë shqiptare, “Tomka dhe shokët e tij”. Me rastin e Vitit Mbarëkombëtar të 80-vjetorit të Çlirimit, DPA-ja i kushtoi një rëndësi të posaçme betejës së shqiptarëve për liri, duke shfaqur 10 realizime filmike që i referohen Luftës Nacionalçlirimtare.